Created on Wednesday, 31 July 2013
မီးလောင်မှု ဖြစ်ပွားနေသည်ကို တွေ့ရစဉ်
ရန်ကုန်မြို့ ဒဂုံမြို့နယ်၊ ယောမင်းကြီးလမ်း လပြည့်ဝန်းပလာဇာ ခြောက်လွှာတွင် ဇူလိုင် ၃၀ ရက် နေ့လယ် ၁၂ နာရီ ၇ မိနစ်ခန့်က ပေါ့ဆမီးကြောင့်ဖြစ်သော မီးလောင်မှုတစ်ခု ဖြစ်ပွားခဲ့ကြောင်း သတင်းရရှိသည်။
ဖြစ်စဉ်မှာ အဆိုပါ အဆောက်အအုံ ခြောက်ထပ်ရှိ လူမနေသော စတိုခန်းတွင် ထားရှိသည့် ဆောက်လုပ်ရေး လုပ်ငန်းသုံး ပိုက်များမှတစ်ဆင့် ပေ့ါဆမီးကြောင့် လောင်ကျွမ်းခဲ့ကြောင်း သိရသည်။
"၀ါယာရှော့ခ်လို့တော့ ပြောတယ်။ တစ်ယောက်ယောက်က ရှို့တာတော့ မဟုတ်ပါဘူး" ဟု ယင်းအဆောက်အအုံမှ လုံခြုံရေးတစ်ဦးဖြစ်သူ ဦးညိုမောင်က ပြောကြားသည်။
ထို့ပြင် ၎င်းကပင် "ကျွန်တော်က အောက်မှာရောက်နေတာပါ။ မီးလောင်တယ်ဆိုတာကြားတော့ အပေါ်တက်လာတယ်။ ပြီးတော့ လူတွေကို အောက်ကိုဆင်းဖို့ ပြောတယ်။ မီးလောင်တဲ့ဖြစ်စဉ် အကုန်ကိုတော့ ကျွန်တော်တို့ရဲ့ incharge ကတော့ မြင်လိုက်တယ်" ဟု ဦးညိုမောင်က ဆိုသည်။
အဆိုပါ ဖြစ်စဉ်တွင် ထိခိုက်ဒဏ်ရာရသူ မရှိကြောင်းနှင့် မီးသတ်ယာဉ် ၁၁ စီး၊ အထောက်အကူပြုယာဉ် ငါးစီး၊ အုပ်ချုပ်မှုယာဉ် ငါးစီးတို့ လာရောက်ငြှိမ်းသတ်ခဲ့ပြီး ၁၂ နာရီ ၃၁ မိနစ်တွင် မီးငြိမ်းခဲ့ကြောင်း သတင်းရရှိသည်။
မီးလောင်မှုနေရာသို့ ရန်ကုန်တိုင်းဒေသကြီး လုံခြုံရေးနှင့် နယ်စပ်ရေးရာဝန်ကြီး၊ မီးသတ်ဦးစီးဌာန ညွှန်ကြားရေးမှူးချုပ်၊ ရန်ကုန်တိုင်းဒေသကြီး ရဲတပ်ဖွဲ့မှူး၊ ဒုတိုင်းဒေသကြီး ရဲတပ်ဖွဲ့မှူး၊ အကူတပ်ဖွဲ့ခွဲမှူး၊ အနောက်ပိုင်းခရိုင် ရဲတပ်ဖွဲ့မှူး၊ ဒဂုံမြို့နယ် ရဲတပ်ဖွဲ့မှူးနှင့် တာဝန်ရှိသူများက ရောက်ရှိစစ်ဆေးခဲ့ကြောင်း သိရသည်။
"ကျွန်တော်တို့အနေနဲ့ မီးလောင်မှုဖြစ်စဉ်ကို ဆက်လက်စုံစမ်း စစ်ဆေးနေပါတယ်" ဟု ဒဂုံမြို့နယ် ရဲစခန်းမှ တာဝန်ကျ ရဲတပ်ဖွဲ့ဝင်တစ်ဦးက ပြောကြားသည်။
အဆိုပါ မီးလောင်မှုဖြစ်စဉ်ကို ဒဂုံမြို့မရဲစခန်းမှ (ပ) ၁၇၃/၂၀၁၃၊ ပုဒ်မ-၂၈၅ ဖြင့် အမှုဖွင့်ထားကြောင်း သိရသည်။
အဆိုပါ မီးလောင်မှု ဖြစ်စဉ်ကြောင့် လပြည့်ဝန်း ပလာဇာအနီးတွင် လူစုလူဝေးများ ဖြစ်ပေါ်ခဲ့ပြီး ယာဉ်လမ်းကြောများလည်း ပိတ်ဆို့ခဲ့ကြောင်း သိရသည်။
0 comments:
Post a Comment